بنت عادية

كنت زمان بحس إن في آخر السكة هلاقيكي

بتضللي عليا

زي شجرة توت كبيرة حنينة

مزروعة خير

مروية بالحلم الكبير اللي قلبي بيعيش يحلمه

كنت بقول إني هلاقيكي

نجمة عالية أعلى من كل الشموس

بتضوي علشاني

بتنوريلي السكة قدامي

بتوهبيلي الدنيا والأحلام

وبتزرعيلي حياة جوا قلبي الصحراوي الميت

كنت زمان نفسي ألاقيكي

بس ماكنتش عارف أوصل

والنهاردة وصلت

بس مالقتكيش شجرة، ولا نجمة، ولا نقطة نور

لقيتك ناسية ومشغولة ومحتارة

لقيتك صادقة ساعات وساعات كدابة

لقيتك بتحبي إنك تشتغليني

لقيتك بنت عادية

لقيتك حتى مش شبه الحلم بتاعي