ماريونيت

مربوط بخيط...
ماسك عليا الخيط قوي...
ومشدود قوي
ف إيديّا خيط...
فوق راسي خيط...
وف صدري و ف رجليا خيط....!
والخيط أكيد من فوق قوي ممسوك بإيد
بتحركه وتحرك المفصل معاه
ترخيه شمال...
ترخيه يمين...
أوقات تشد الناحيتين.......
علشان تحرك في العروسة الماريونيت
*********
ف كل وقت الماريونيت بيرقصوا
يتنططوا .. يتشقلبوا .. ويهيصوا...
والرقصة بتصحي اللي ساكن في القلوب
أوقات بنرقص رقصة الفصل الأخير
رقصة الحزن الكبير
رقصة الموت الكئيبة
رقصة لنهاية الطريق.... .
وساعات نلف كتير قوي...
وندوس برجلينا على الأرض البراح
ونحول الصمت لمجون
والفرحة تملا الكون قوي
وكأننا في حالة جنون
*********
ف كل وقت تبص فيه للماريونيت....
هتلاقي شكل جديد عليك
ساعات هتفرح
وتلاقي وشك يبتسم
والضحكة طالعة بتفضحك وتقول عليك
هتلاقي ضحكة ماريونيت
وساعات هتحزن
تلاقيك تشوفنا بدمعتين
دمعة للجرح اللي ساكن
دمعة للخوف الحزين
ودي برده دمعة ماريونيت
********
تسأل عرايس الماريونيت
إزاي عروسة صغيرة...
متكتفة و متربطة ...
إزاي بتعمل كل ده؟
إزاي تنط كتير كده ...
هترد كل الماريونيت تعرفك
أوقات نطير و لفوق قوي....
أوقات ننام...
أوقات بنرقص ع الرخام
أوقات بنملا الجو جد كئيب كده
وساعات هزار
لكن أكيد الماريونيت .. رقصتها مش بالاختيار
Ahmed Mohamed El-Saeed