ساقية

 

رغم كلام الناس المرعب
رغم التحذير المتكرر 

كله يقرب 
كله يحاول إنه يجرب 
كله بيركب 
كله بيلعب نفس اللعبه 
نفس الفكره 
نفس الحركه 
كله بياخد نفس الدور 
 
بعد اللفه الأولى بيفرح 
يطلب تاني و تاني و يدفع 
بعد التانية بيبدأ يتعب 
بعد اللفه التالته يدوخ 
فجأه يحس بروحه بتطلع 
فجأة يلاقي الدنيا اسودت 
فجأة يلاقي عنيه بتدمع 
فجأة يحس بطعم الموت 
بعد اللفه يحاول يهرب 
بعد ما يهرب 
واحد تاني بيبدأ يركب 
تاني تقوم الساقية تدور 

نافورة

من حوالي 13 أو14 سنة، بابا كان أياميها بيعمل حملة تجميل في بيتنا، في وسط الحملة دي قرر إنه يعمل عندنا في الجنينة بتاعتنا نافورة

كانت النافورة بالنسبة لينا حاجة بنشوفها في الأفلام و المسلسلات و كانت حاجة أكيد جديدة علينا إحنا نفسنا

و كانت حاجة أكتر من جديدة على أهل البلد عندنا، لدرجة إن كان الناس كلها بتحكي و تتحاكى عنها، و كان كل عيال البلد بييجوا يتفرجوا عليها و هي شغالة، باختصار كانت النافورة فكرة ثورية من أفكار بابا الكتيييييييييير

بابا لما بدأوا في تنفيذ النافورة، كان قدامه حلين إما إنه يجيب نافورة رخام جاهزة، بس قالوا إنها صعب تيجي بالحجم اللي هو عايزه و هتكون غالية قوي، فبابا اتجه للحل التاني وهو إن النافورة تتعمل عندنا

النافورة اتعملت من السيراميك و القيشاني اللبني، مش عارف كان ليه اللون ده بس كان لون جميل، أكيد كان تصميمها و تنفيذها مش باحترافية قوي لكن كانت شغالة

كانت النافورة عبارة عن حوض كبييييير و فوقه 3 طبقات، كل طبقة كانت أصغر من اللي تحتها، كان الحوض فيه كشافات ألوانها أحمر و أزرق و أخضر

و كانت الميه بتشتغل في النافورة عن طريق نظام داخلي بيعتمد على ماتور عادي للسحب و الضخ، و كانت الميه بتتخزن في الحوض و بتطلع عن طريقة فتحات صغيرة كتييرة قوي على الطبقات التلاته

في الأول كانت النافورة لما بتشتغل بتدي شكل جميل قوي و بتعمل جو رائع فعلاً، و كنا بنشغلها على طول و كنا بنهتم بيها جداً

كنا دايماً بنروح نلعب في الميّه اللي فيها و ياما اضربنا و اتزعقلنا بسببها

مع الوقت بدأ ولعنا بالنافورة يقل، و بطلنا نشغلها و بطلنا نملاها بالميّه، لكن كنا دايماً بنحب منظرها و نحب نلعب عندها

لكن مع الوقت برده، بدأ الشجر اللي حواليها يكبر و فروعه تكتر، و بدأت النافورة تختفي وسط الشجر بالتدريج، أكيد ماختفتش يعني لكن كل الاهتمام اللي كان بيها اختفى

إنهارده الصبح و أنا خارج من البيت رايح أصلي مالقيتش النافورة، لقيت بابا كسرها و شال الشجر اللي حواليها، و لقيتها اختفت للأسف و مش عارف هو ناوي يعمل ايه مكانها

أنا عارف إن النافورة مكانتش جزء مهم في حياتي في الفترة الأخيرة، و لا كانت من الحاجات المحببة ليا

لكن لما اختفت حسيت إن في حته من ذكرياتي راحت، حسيت إني فقدت حاجة كنت بحبها

بس للأسف النافورة زيها زي أي حاجة حلوة في حياتنا، بتختفي مع الوقت

أنا 2009

كل سنة و أنا طيب و أي حد بيتكرم عليا و يدخل يقرألي بالصحة و السلامة و يارب دايماً في أحسن حال

خلص 2009 على خير و خلاص بدأنا في 2010 و الحمدلله

ربنا يكرم و تكون سنة جميلة علينا كلنا يارب

بيقولوا إن 2009 كانت صعبة على الناس كلها في مصر و في العالم كله حتى

بيقولوا إنها كانت الحظ السيء و النحس الفظيييع على كل الناس بمختلف أشكالهم و أنواعهم

بس أنا بقى مش شايف كده خاااااااالص على فكرة

أيوة 2009 كانت فيها شوية أزمات و كان فيها حاجات صعبة كتيرة قوي

و أيوة كان فيها فترات اكتئاب كتييييييييييييرة قوي أكتر من أي سنة

لكن بالرغم من كل ده فهي كانت أكتر سنة اتعلمت فيها و أكتر سنة عرفت فيها، يمكن أكون اتعلمت في 2009 أكتر من اللي عرفته في و اتعلمته في حياتي كلها

أكتر سنة شفت فيها الناس و الدنيا

أكتر سنة عشت فيها بجد، و دقت طعم الحياة بحلوها و مرها

أكتر سنة  عرفت فيها ناس و شفت ناس أكتر ما عرفت و شفت في حياتي، و أكتر سنة اكتسبت فيها أصدقاء

أكتر سنة اتطور فيها مستوايا في الكتابة و قدراتي فيها، وكمان السنة اللي عملت فيها مدونتي و السنة اللي زاد فيها نشاطي على الفيس بوك جداً

أكتر سنة عشت فيها تجارب و اكتسبت خبرات و بجد بجد أكتر سنة عشتها

في آخر 2009 بقى كان لازم إني أعد مكاسبي و خسايري فيها

مش هقول إنها خساير لكن نقدر نقول إنها هزايم في حاجات أنا خضتها و دخلتها و عشتها

اتهزمت مثلاً في الدراسة، كانت أسوأ بالنسبالي على المستوى الدراسي، بس الحمدلله إني بعدي و أنا مش بطلب اكتر من كده

انهزمت عاطفياً لأني مريت بتجربة مقرفة حبتين بس الحمدلله ربنا ستر عليا و لسه عايش أهو

فقدت فيها ناس كنت بعتبرهم من الأركان الأساسية في حياتي، بس أنا اتعودت إني مازعلش على حد سابني

أكتر الحاجات اللي كسبتها كان أصحابي اللي اتعرفت عليهم و اللي ربنا يخليهم ليا كلهم يارب

المدونة بتاعتي اللي أتمنى إنها تفضل ركني البعيد الهاديء و اللي أتمنى برده إنها تفضل منارتي و منبري حتى لو ماحدش كان بيسمع صوتي إلا أنا و بس

كسبت نفسي إلى حد كبير، بدأت أفهمني و أعرف انا عايز ايه و محتاج ايه، بدأت أتعلم أكون الإنسان اللي دايماً كنت بتمنى إني أكونه

أنا كده خلصت اللي عندي عن 2009، خلينا نشوف 2010 مخبيالنا ايه، و نتقابل زي إنهاردة بعد 365 يوم عشان نحكي عن 2010