صباح الخير عليكم جميعاً، صباح الورد والفل والياسمين وكل الحاجات الجميلة، صباح الحرية على كل مصري ومصرية
اللي حصل امبارح ده شيء ولا في الأحلام، وحاجة مكانش حد ممكن يتخيلها ولو كان حد قال إن المصريين هيعمله ثورة كنا أكيد هنقول عليه مجنون. لكن حصل وعملناها وكانت مفاجأة لنا إحنا نفسنا، لكن عملنا أجمل وأعظم ثورة في التاريخ كله
خلال أيام الثورة أنا فعلاً اتعلمت حاجات أكتر من اللي اتعلمته في حياتي كلها، أو خلينا نقول إن الحاجات اللي طول عمري بسمع عنها في الحكايات ومش بلاقيها غير في الكتب، شفتها بعنيا وجربتها وحسيتها. شفت التكاتف والتكافل والتعاطف والمودة والتسامح والأخوة والمروءة والكرامة والجرأة والشجاعة والنبل والكرم والعزة والاحترام والأدب والشهامة والإنسانية والجدعنة وكل المعاني الحلوة اللي كنت متخيل إنها مش موجودة. الثورة فعلاً غيرت جوايا حاجات كتير قوي وعلمتني حاجات كتير قوي وأتمنى فعلاً إنها تكون بداية صح ليا كإنسان وكمواطن
ماقدرش أنكر إني أوقات كتير حسيت بالضعف والخوف والتخاذل والاستكانة والفشل، أوقات كتير حسيت إن كل اللي بنعمله مالوش لازمة وكنت طول الوقت بسأل نفسي هي الحرية فعلاً مستاهلة كل ده؟ هي الثورة دي هتنفع بجد؟ ولا إحنا اللي أحلامنا أكبر من اللازم؟
إمبارح بعد بيان التنحي حسيت بفرحة وسعادة حقيقية يمكن عمري ما حسيتها في حياتي، فرحة إنك تحلم حلم ويتحقق أو إنك تتعب عشان تصنع حاجة وتشوفها قدام عنيك، حسيت إني فعلاً بحب البلد دي أكتر مما كنت أنا نفسي متخيل
انهاردة الصبح أول ما طلعت الشمس حسيتها مختلفة، حسيت إن ليها دفا عجيب بيلمس القلب من جوه، حسيت إن نورها بيلمع بدرجة ماشفتهاش قبل كده. الهوا انهاردة كمان مختلف، أول مرة أعرف معنى كلمة الهوا اللي يرد الروح، أول ما مليت صدري بهوا الفجرية لقيتني غصب عني بقول "شميت هواكي لقيت نفسي" حسيت فعلاً إن انهاردة يوم جديد
انهاردة فعلاً مختلف عن إمبارح وعن كل الأيام اللي فاتت، ممكن ماتكونش نتايج الثورة ظهرت فعلاً، لكن انا انهاردة بجد شفت شمس الحرية وهي بتنور كل حتة في مصر، شفت نسيم الحرية وهو بيملا كل مكان في مصر، إنهاردة فعلاً حسيت بالحرية. وعرفت إن آه الحرية تستاهل كل اللي عملناه وأكتر وآه إن الحلم يستاهل وآه إن مصر تستاهل، يستاهلوا بجد أكتر من اللي عملناه وأكتر من اللي بنعمله وأكتر من اللي هنعمله
في حاجة أخيرة عايز أقولها
أنا من كل قلبي بشكر كل الشهداء اللي ضحوا بحياتهم، بشكر كل الناس اللي اعتقلوا وكل الناس اللي انضربوا وكل الناس اللي اتبهدلوا. بشكر كل الناس اللي بيحبوا البلد دي وكل الناس اللي بيحلموا إنها تبقى أحسن. بشكر كل الناس اللي نزلوا الشارع واتحدوا مبارك بنظامه بأمنه برشاشاته بقنابله بعصيانه ببلطجيته. بشكر كل اللي الناس وقفوا قصاد الظلم والفساد والغرور والجبروت، كل الناس اللي سابوا بيوتهم وأهاليهم وحياتهم ونزلوا يعتصموا في الشارع. بشكر كل حد آمن بالثورة وصدقها وحلم بيها وكل حد شارك فيها وكل حد كان نفسه يشارك وماعرفش وكل حد تعاطف مع الثورة وحتى كل الناس اللي رفضوها ووقفوا ضدها. بشكر كل حد ضحى عشان خاطر مصر وعشان نشوف اليوم ده ونحس اللحظة دي
بشكركم كلكم وبوعدكم إننا مش هنخذلكم وإننا هنكمل المشوار لحد مانخلي البلد دي أحسن وأنضف وأجمل وأعظم بلد في الدنيا كلها
صباح الحرية ... وتحيا مصر