من غير وداع

برغم إني ماليش غيرك
و رغم إنك مفيش ف الدنيا دي زيك
برغم إنك حياتي و روحي و وجودي
لكنك لسه مش عارفه
ولا حاسه و لا شايفه
ولا فاهمه اللي جوايا
ولا بتديني فرصه أحكي

فأنا هرحل
و يرحل شوقي لعنيكي
و ترحل رغبتي فيكي
و يرحل حلمنا الضايع
أنا هرحل
و هتغرب
و أضيع ف الدنيا و الأيام
وأضيع ف الناس
و أضيع فيا
وأضيع من ذكريات عمري
و من حلمي
وأضيع مني

أضيع في الغربه و الوحدة
أضيع فيكي
و أضيع منك
وأقضي حياتي في التوهه و في المشاوير
وأقضي العمر بنساكي
و مش هنسى
هضيع مني
يضيع اسمي
يضيع الحلم جوايا
يضيع العمر في هواكي
و برده لسه مش حاسه

ترانيم الفراق

(1)

أنا وأنتي ودنيتنا
و سكتنا
وحلم حياتنا و المعنى
و كل الذكريات بينا
بقت ماضي
وجرح بيحكي أوجاعنا
خلاص نهايتنا محسومة
و سكتنا خلاص خلصت
و قصتنا اللي كانت يوم بتجمعنا
خلاص ضاعت مادام ضعنا


(2)

أبص عليكي
من بعيد لبعيد و ألاقيكي
عارفه نفسك
عايشة حالك
قافلة باب العمر عليكي
طب أنا ليه ماطلعتش زيك
لسه فاكرك
لسه عايزك
لسه مش عايش غير ليكي


(3)

العادي بتاع الناس دلوقتي إنها تتغير
حتى أنا أحيانا بتغير
و مابعرفنيش
و باتوه عن ناس كنت أعرف
و كتير مش بفهم أصحابي
و لا أهلي و أعز قرايبي
طب ليه مستغرب لما لاقيت إن أنتي كمان اتغيرتي

ماتفهمنيش

ماتفهمنيش
وماتجربش تعرفني
ولا تحاول تقرب مني و تشوفني
ولا تجرب تفسر أي حواراتي

و لا تحاول، ولا تجرب
ولا تسأل عن الحلم اللي ف عنيا
عن الكلمة اللي محبوسة ورا صوتي
عن الحالة اللي واخداني
عن الفكرة
عن المعنى
عن الدنيا اللي جوايا

ماتفهمنيش
ولا تسمع صدى صوتي
ولا تقرا ما بين السطر ف كلامي
ولا ترسم خطوط نظرية لكياني
ولا تحاول تعدي فوق حدود نفسي
تشخص ف الهوى حالتي
و تكتب معنى لحياتي

ولا تقرب ولا تجرب ولا تحاول
ولا تقرا ولا تفكر ولا تفهم
ولا تعيش الحياه فيا
عشان أصلا ماتعرفنيش

الحلم ماطلعش حقيقي

لما تجيلك واحدة ف حلمك

فجأة تحس إن أنت عارفها

و حاسس بيها

وحافظ رسمة نني عنيها

و سامع صوتها

وعارف كل عروق الدم ف كف إيديها

حتى إن كانت مش عارفاك

وصدفة تشوفها

نفس ملاكك و الجنية وست الحسن

نفس الفرحة ونفس الضحكة ونفس الحزن

نفس البنت اللي أنت راسمها

نفس الحلم الساكن قلبك

نفس الروح اللي أنت بتحلم تبقى معاك

تعرف إنك

طول الوقت الضايع منك مستنيها

طول العمر الفايت عايش تحلم بيها

تحلم إن البنت الحلوة بتستناك

تيجي تقرب

نفسك إن الحلوة تشوفك

نفسك تبدأ تحلم بيك

نفسك إنك تملى عنيها

تملى حياتها

تملى حدود الكون الواسع من حواليها

تلقى البنت الحلوة ماهيش حساك

رغم العشق الطالع منك

رغم الحب الباين جوا عنيك

رغم ضلوعك اللي بتنزف

رغم هواك القاتل قلبك

رغم الدم السايل منك

رغم حياتك اللي شايلها ف كف إديك

رغم الدمعة

رغم الكلمة

رغم الشعر الواضح إنه بيحكي عليها

برده البنت الحلوة ماهيش شايفاك

اعترافات أحمق

لم أخطأ إذ صدقتك
إذ صدقت حديثك و حوارك و كلام عيونك
إذ صدقت بأنك لي
لا لم أخطأ

لم أخطأ يوم وهبتك قلبي
يوم نقشت حروفك فوق ذراعي
لم أخطأ يوم تقربت إليك بنفسي و بعمري و كتاباتي
يوم بعثت إليك بروحي
لم أخطأ يوم جعلتك رمز حياتي

لم أخطأ إذ أنصت لصوت الذئب
حين سمعت حديث النسوة
حين صعدت بجسدي فوق صليب هواك
حين عشقتك
حين تأرجح عنقي في مشنقتك
فأنا لم أخطأ
خطأي الأوحد أن آمنت بأن الأفعى قد تنتج غير السم

فرحة

الأحزان بتهد الحيل
الأحزان بتبهدل
بتضيع روحك، و بتسرق عمرك
وتطفي النور القايد جوا عنيك
لو سبت حياتك للحزن هيقضي عليك
خليك واقف
انفخ صدرك، وافتح قلبك
اصلب عودك
وافتح بابك للأفراح
لو قادر تضحك، اضحك
و ماتستناش
حتى لو العالم من حواليك بيموت
لو قادر تفرح، افرح
مش لازم تستنى الفرحة
اصنع فرحة
كون الفرحة
وارسم على وشك بالفرحه
دور وشك ناحية شباكك اللي بيدخل منه النور
طلع من قلبك حرية
اعشق نفسك
حب العالم من حواليك
قضي حياتك زي ماتحلم
شوف الدنيا بشكل جديد
اخلق فرحه
عيش الفرحه
وارسم على وشك بالفرحه