امبارح وفي مفارقة عجيبة شفت على قناة المحور كليب لأغنية يا حبيبتي يا مصر لشادية بصور حسني مبارك وأبوتريكة وحسن شحاتة وعادل إمام وتامر حسني والموديلز بتوع إعلانات الحزب الوطني ومشاهد من مارينا وشرم الشيخ وحتتين الآثار اللي لسه ما اتباعوش ولا اتحرقوا ولا اتسرقو
وحسيت قد ايه كنا تافهين وسذج ومغيبين لما اعتبرنا إن الأغنية معمولة عشان الناس دول
بعدها بأقل من نص ساعة شفت كليب تاني لنفس الأغنية على قناة ON TV بصور الشباب من التحرير والمظاهرات والثورة
شفت صور الأمل والحب والمستقبل وحب الحياة اللي ف عيون الولاد وصبايا البلد
شفت العمل والحق والحرية اللي سهرانين في البلاد وشفت العزم والإصرار والصبر وقت ما بيتولدوا
ماشفتش النيل في أحضان الشجر بس شفت المصريين ولأول مرة وهما في أحضان بعض بجد
شفت الرجال السمر الشداد اللي بجد بجد فوق كل المحن وكل المخاطر وكل الوجع
شفت الناس اللي بيتحدوا مش بس الزمن، لكن بيتحدوا الظلم والقهر والخوف والكذب والاستسلام والضعف والجبن
شفت الإصرار في العيون والشجاعة في القلب والطهارة في الروح والنبل في النوايا والسمو في التفكير والصدق في الإخلاص
شفت الأحرار اللي بجد، الناس اللي ماخافوش من حاجة ولا من حد. الناس اللي ضحوا بأرواحهم وبحياتهم وبمستقبلهم عشان خاطر البلد وعشان كده لازم ولابد والطبيعي إنهم هينتصروا
شفت أجدع ناس وأنضف ناس وأشرف ناس وأطهر ناس، شفت المصريين اللي بجد اللي آمنوا وصدقوا إن البلد دي تستاهل نضحي عشانها وحلموا إنها تبقى أحلى وأجمل وأقوى
شفتهم ووقتها حسيت إن الأغنية متفصلة عليهم قوي، ومش بس هما لكنها فعلا بتقصد مبارك ونظامه وإعلامه وأعوانه ومؤيديه، لأن دول بقى اللي بجد ماعدوش على مصر
No comments:
Post a Comment