أنا ماخترتش الغربة
ولا عايز أكون وحدي
ولا قاصد أكون رحال
صحيح كان نفسي مرة أطير
يكون طيراني حرية
وغسيل للروح
وأكون فرحان
ولما أتعب من الطيران
ألاقي عنيكي تندهلي
تكوني الحضن والمرسى وبر أمان
ولما حاولت إني أطير
لقيت جناحاتي مكسورة
ومربوطة
ومقصوصة
ووهم كبير
لقيت غربة
ولقيت ترحال
لكن مالقيتش حرية
ولا فرحة
ولا أحضان
ولا جنة
ولا مرسى
ولا طيران
ومالقيتش الحياة حلوة
ومالقيتكيش
No comments:
Post a Comment