ليه...
فوق ف السما كانت بالنسبة ليا مجرد حلم
كنت دايماً بفكر في إني اعمل مدونة
مش عشان حد يقراها أو عشان حد يدخلها
لأني بصراحة بكتب عشاني انا مش عشان حد تاني
لكن كانت الفكرة في إني حاجة نفسي اعملها وطريقة تانية احاول بيها أسبر أغوار نفسي-حلو التعبير ده- وأوصل للإجابة اللي دايماً بدور عليها
أنا مين
اشمعنا....
الاسم ولا الفكرة؟
خلينا في الفكرة
فكرة فوق في السما مش عشان الطيران مع إني بجد كان نفسي اعرف أطير وأعلى فووووووووق قوي
وزي ماقال أبو القاسم الشابي
سأعيش رغم الداء والأعداء*******كالنسر فوق القمة الشماء
لكن فكرة فوق في السما عن الوصول
الوصول لأي حلم وتحقيق أي هدف
يمكن لو حد قرأ القصيدة بتاعتي المعنون "السما السابعة" هيفهم قصدي أكتر
أنا السما بالنسبة ليا هي كل حلم وكل طموح بحاول أوصله
هي الغاية الكبرى من الوجود
السما بالنسبة ليا هي كل حاجة
أما بقى بخصوص الاسم فهو ده اللي لقيته متاح قدامي ويقدر يعبر عن فكرتي
معلش بقى أنا اللي اتأخرت لحد ما كل الأسامي اتاخدت بس برده فوق ف السما اسم حلو
ولا ايه؟
إزاي....
فوق ف السما زي أي فكرة بتجيلي وأي حاجة بحاول أعملها
يمكن انجح ويمكن أفشل
بس ايه مقياس النجاح أو الفشل في حاجة زي دي؟
هل هو تفاعل الناس معاها وتعليقاتهم عليها وإعجابهم بيها ؟
ولا هو درجة رضايا أنا عنها وعن اللي بعمله
ده هيرجعنا تاني للفكرة
أنا بكتب لمين، أنا ولا اللي بيقروا؟
أنا بكتب لنفسي
عشان اعبر عني أنا
وأنشر أفكاري أنا
وبأسلوبي أنا
أكيد أنا زي أي حد بيكتب بتمنى إن الناس تقرالي ويتفاعلوا معايا
لكن بكل صراحة
لا أعتقد إن ده هو المقياس الوحيد للنجاح
وأخيراً
أتمنى أن تكون مدونتي فوق ف السما هي تجربة مفيدة لنا جميعاً
تحقق لينا كل الأهداف اللي ممكن نرجوها منها
سلام
No comments:
Post a Comment