والدي العزيز .. من فضلك لا تدعي الوطنية

النوت دي أنا بوجهها في الأساس لبابا ولكل الآباء والأمهات وكل الناس اللي بيمنعوا أهلهم وقرايبهم من النزول للشارع والمشاركة في الثورة

لكل الناس اللي لسه لحد دلوقتي بترفض إنها ترفض تاخد تحرك إيجابي

لكل الناس اللي كل اللي بيعملوه هو الاكتفاء بالمشاهدة والفرجة وإبداء التعاطف بينه وبين نفسه

لكل الناس دي بقولهم أنتم أسوأ من الناس الجهلة

أسوأ من الناس المغيبة اللي لحد دلوقتي لسه مايعرفوش إن البلد فيها ثورة

أسوأ من الناس اللي مش دارية بحاجة ولا كأنهم عايشين في البلد

أنا لو كنت ممكن ألتمسلهم العذر بجهلهم أو قلة ثقافتهم فأنا أقول عليك ايه؟

أنت المفروض مثقف والمفروض عارف حقك لأ وأكتر من كده أنت عارف ايه اللي بيحصل في البلد ومتابع كل حاجة باللحظة

أنت حتى أسوأ من الموالين للنظام وأسوأ من رجالة النظام نفسهم، هما ممكن بيقولوا تهمنا مصلحة البلد لكن بيدوروا على مصلحة شخصية، إنما أنت بتدور على ايه وبتشتغل عشان مصلحة ايه ومصلحة مين؟

أنا عارف إنك حجتك إنك خايف علينا أو إنك عايز مصلحتنا، طيب والبلد دي مش بلدنا؟ الثورة دي معمولة ليه ولمصلحة مين؟ ما هي دي مصلحتنا برده ودي بلدنا برده

عارف لو قلتلي أنا ضد الثورة وضد اللي بيحصل أنا هسكت ومش هتكلم معاك أساساً، لأنك على الأقل وقتها هتبقى أخدت جانب مافضلتش عايم كده لا طعم ولا لون ولا رأي ولا صوت

إنما أنت عارف ومع كده فضلت تسكت، عرفت الحق وماساندتوش، عرفت ايه الصح وماعملتوش، أنا آسف إني أقولك كده ولكنك فعلاً شيطان أخرس

أنا يؤسفني أقولك من فضلك لا تدّعي الوطنية

من فضلك ما تتابعش الأبخار وكل شوية تيجي تسألني ايه آخر الأحداث والمظاهرات

من فضلك ماتتأثرش قوي بصور المتظاهرين وفيديوهات التظاهر

من فضلك ماتعيطش لما أقرألك شهادة عمرو سلامة عن الضرب والاعتقال والبهدلة اللي حصلتله يوم 25 يناير

من فضلك ماتتمزجش قوي وأنا بقرألك النوت بتاعت أحمد العسيلي عن يوم التحرير وماتفضلش تقولي أنا قلت كده أنا عملت الكلام ده

من فضلك ماتدنيش محاضرات بعد كده عن الحق والعدالة والخير ومن فضلك ما تدعيش الوطنية ولا تدعي حب الوطن لأنك أثبت إن كل علاقتك بالحاجات دي هو الكلام مش أكتر

من فضلك ما تنفعلش قوي لما أتهمك بالتخاذل وتقوم تزعق وتقولي أنا أكتر وطنية من الناس اللي نزلوا الشارع، الوطنية يا بابا ماتنفعش من تحت البطانية

من فضلك لا تدّعي الوطنية

بس في الحقيقة أنا أسوأ منك

وأنا كمان لن أدّعي الوطنية

ولن أدّعي إني بحب البلد وإني مع الثورة

أنا أقل من كل الناس اللي شاركوا وأقل من كل الناس اللي نزلوا، أقل منهم لأني جبان

الناس ماخافوش على نفسهم ولا على أرواحهم وهما بيواجهوا العساكر والمدرعات وقنابل الغاز ومدافع المية

ماخافوش لما قرروا ينزلوا ويضحوا عشان خاطر الناس وعشان خاطر البلد

ما خافوش لما قرروا الثورة على الحكومة والنظام والفساد في البلد

إنما أنا خفت منك وخفت من مواجهتك وخفت إني أعبر عن رأيي وإني أوصل صوتي

أنا بكرة هحاول أنزل وهحاول أكون مع الناس، بكرة هحاول لأول مرة في حياتي أحس إني بني وبكرة هحاول أبطل أخاف

هحاول