تسمحلي ... ؟

تسمحلي ... ؟
أول مرّه قابلتَك فيها، حصلّك ايه ؟
فاكر، ولا تحب أقولك ؟!
طَب آخر مَرّه مشيت ويّاك ...
فاكر ؟
طب فاكِر لمّا خرَجْت معاك ...
لما نَصَحتَك ...
لما خنقتَك ...
لمّا جَرَحتْ شعورك ...
فاكر؟

أنا دلوقتي بقولّك ...
أنا مش عايز أشوفَك تاني ...
مش عايز أحسك ...
مش عايز أكون ويّاك ...
ممكن تنساني ؟
تسمحلي أهرب منّك ؟
أطلع من جواك ؟
أخرج من ضلّك ؟
أنزل من تحت جناحك ...
تسمحلي أبعد عنك ؟
ممكن تسمحلي أعيش ؟

ويا سيدي ولا تزعل نفسك
يوم ما تحب تشوفني
يوم ما تحس إن أنا واحشك
لمّا تعوزني أشّد إيديك ...
افتح نور الأوضة بتاعتك ....
أو شباك الحمام
خُد خطوة لقُدام ...
بُص كويّس ...
شايف ؟
أنا جنبك أهو ...
أنا بضحكلك ...
أنا واقف ف مرايتك