بلدنا الجميلة النضيفة السعيدة
بلدنا اللي هنا عليها
بلدنا اللي فيها بتغلا السجاير و تغلا الجرايد و يغلا الدقيق
دقيق كله ردة و نشارة و زبالة
بناكله عشان يملا جوعنا اللي هادد ضلوعنا و قلب علينا المواجع
و وقع دهان الحيطان جوا بيت مش ساترنا
عشان كان لاممنا بلمة تفرق مابين الشقايق
بلدنا الجميلة
اللي فيها الشريف يمشي حافي
و فيها اللي عايز يأكل عياله حلال بكره يشحت
و فيها الحرامي اللي سارق و ناهب و عامل عمايل
بيركب بلدنا
و يركب علينا
و يملا دماغنا بحب البلاد الجميلة
و يملا جيوبه بخيرنا و خير من جابونا وجابوا بلدنا
بلدنا النضيفة
اللي فيها الحرامي بيقعد ف كرسي الوزارة
و فيها النضيف يبقى أهبل
و لازم ينضف دماغه من الكلمتين اللي أقسم عليهم
عشان الأمانة مكانها الوحيد في كتاب المدارس
و إلا هيصبح غزالة سمينة ف وسط الديابة اللي حاكمين بلدنا
بلدنا السعيدة
اللي مش فالحة غير ف الرياضة
و حتى الرياضة
ماهيش عارفة تعملنا حاجة فيها
و مش عارفة توصل بنا كأس عالم
عشان إحنا أصلا بلد للعوالم
بلد للغوازي
و للنصابين اللي من كل حته
و للمطربين اللي صوتهم نشاز، عشان ذوقنا باظ
و باظت معاه الحياة في بلدنا
بلدنا الجميلة النضيفة السعيدة
No comments:
Post a Comment